Einucent's Weblog

Com’un aire de prima

Posted in Uncategorized by Mars on Març 23, 2010

Aime mon appartament, sèm a far daus braves trabelhs dins quèu de Lutz mas totparrièr, aime demorar dins lo mèu.

Quete matin (bon, fai quauqes jorns aura) me leve e me ne’n vau a la cuesina machinalament coma de costuma e tòrnèi descubrir qué m’agradèt en m’installar ‘quí : la clarda. Mon appartament es un solièr amesnatjat au tresenc plan, las finestras son bassas (de la cinta aus pès) si de non son daus occuli d’aeracion. Lo sejorn a bien un grand Was-ist-das que fai un brave potz de clarda dau jorn mas de costuma lo demai es un pauc sombre.  …De costuma manca quora lo solelh es bas, mai bas que la teulada ò gaireben, qu’es de dire lo mandin e lo ser. Fau comptar tamben que la charrièra daus vargiers es orientada Est-Oest a pauc prèp, quò fai que passat 10-11 oras lo solelh es trop naut per balhar de la clarda per las finestras, quò tòrna a l’entorn de 4-5 oras dau ser mas d’un biais mens evident, a queste moment vau melhor visar esprès defòra per trapar la lutz polida de brica ròsa de Tolosa. I a n’autra Lutz polida dins ma vita mas quela de quí a d’autres oraris…

Laidons en me levar que mandin, pas completament revelhat, enchadene los gestes costumiers e me plante amb ‘na cierta impression de déjà-vu.

Estranhament qu’era pas lo parrièr que me tòrna suvent au mès de mars, queu que me fai pensar que venguèi en auto-stop un jorn de març de 1997 a Tolosa per lo prumièr còp. Queu que me fai dire « X ans i a te n’era jà a te ne’n meravilhar de queu aire fresc e de quilhs prumièr rais de solelhs au detorn de ‘na vanela a ne’n dubrir grand tos uelhs ‘mas tirats dau somelh per ne’n perdre pas lo mendre boçin. » Semblariá que dins la gama daus gosts dau suvenir n’i a que son desparrièrs. Puèi ere pas per la charrièra d’ora en constatar que l’i fai pas freg, non qu’era quauqua-ren de mai. Qué podian bien me dire quela clarda viva dintrada de costat, quela cafetiera amb la patina de sos ans, quilhs pelhon pendilhats a nautor de mon espantla ? Barcelona ! Sodentament, me sentissiá dins l’appartament dau Carles a Barcelona, carrer de les Freixures, en 2003. D’un còp venguèt l’evidènça, sens me ne’n mainar dempuèi, aviá tornat creat a Tolosa lo parrièr qu’aviá trapat dins la capitala catalana un an davant de m’installar dins queu appartament.

Quò devia èsser lo 17 ò 18 de març, dempuei la data oficiala de la prima es passada (bon anniversari frairon) mas quò ne’n avia jà lo gost, e m’agrada toplen. Avem 2 mes per ne’n profiechar, en junh fara jà chaud a Tolosa, au punt que sira tròp per me, mas se voletz venir qu’es aura lo melhor, qu’es tant agradiu qu’a Barcelona.

Advertisements

Taulets

Posted in Marengo by Mars on Març 8, 2010

Dau temps que ‘la se mainava de fustariá, Lutz lasurèt tamben las pòsts que van far daus taulets sus lo beton celulari, veiquí lo pitit pan de paret que dessepara la cuesina de la pòrta de dintrar, amb las pòsts blanchas dau dejós que son estadas recuperadas dins las vòrras qu’eran vissadas sus la pòrta

E veiquí la dau bar qu’es d’engerras a sechar per esperar sa tresena lissa, auretz calculat en passar que lo bar venguèt violet…

Las fòtos me disen que las son estadas presas entre lo 13 e lo 20 de febrièr, queu post fai part de ‘na seria de tornar trapar l’istorique daus eveniments…

Pòrta de la chambra de durmir

Posted in Marengo by Mars on Març 8, 2010

Lutz s’a mainat de pintrar totas las fustarias. La pòrta de la chambra freta lo lino pel sol, coma vam metre un parquet, la deu imperativament èsser trenchada d’un biais que siá mens lonja.
La trenche a la sija sautadoira mas i a totjorn besunh de corrigir amb lo rabòt, la raspa e la lima, quora i a un nos que fai virar la lama.

Quela porta se dubrís de vers lo liech e oblija a dintrar dins la chambra en ‘nar costejar la paret allèra que la se sarra a 45° amb un radiator amai… (vejatz lo plan)
Pas question de la gardar entau, bosche tots los traucs, que sian sus la pòrta ò sus lo chambran, e ne’n chave d’autres a la bona plaça. Sus lo chambran, fau inversar de mança a dreita, sus la pòrta qu’es de ‘na fácia l’autra.

Coma fau pas sijar tròp luenh, los talhe au ciseu davant de chabar pròpament a la lima. Tamben, coma la fòrma seguís las fibras dau bòsc, i a besunh de jugar amb la pasta de bòsc per tornar trapar l’espessor que vai bien.

L’empaçament dau bloc de sarralh conven pas per i plaçar ‘na charniera, quò me damandaria de burinar dins lo tenon que ten los paneus que Lutz a cubert d’Isorel, tròp riscat, place laidons ma charniera mejana un pauc debas e trace un trauc de mai de far sus lo chambran.

Veiquí, un còp pintrada de son gris clar definitiu, pus ren se veu.

Las fòtos me disen que las son estadas presas entre lo 25 de genièr  e lo 2 de febrièr, queu post fai part de ‘na seria de tornar trapar l’istorique daus eveniments…

Pintrura 3

Posted in Marengo by Mars on Març 8, 2010

I a ‘gut de la nèvia davant la Nadau, quauqua-ren de completament excepcionau per Tolosa, dempuèi lo balcon aviam ‘na polida vusda sus las teuladas blanchas. Qu’es per ‘quela rason que las fòtos an ‘na brava clarda blua entau.

Los junts son estats chabats, sèchern pron e aura podem pintrar las parets de beton celulari. començam per jaspir dau journau sus totas las zònas que costejaran la pintrura per riscar pas d’aver dau blanc sus los carrèus.


Un còp tot bien protegit, podem nos percir los ròtles :

 

Lutz pintra delicatament tots los angles e los endrechs un pauc suaus au pitit pinceu e ieu fau las susfácias belas au rotlèu. En dos jorns l’apartament chamnha de color, dau blanc aproximatiu cubert de piaus de chat ad’un blanc pròpe tot nòu. Quò fai plaser de veire lo result dins la jornada !

Per ‘mor que i a totjorn tot lo materiau dins la chambra principala, sem oblijats de sarrar tot contra la paret d’un costat puèi l’autra.Las fòtos me disen que las son estadas presas entre lo 18  e lo 19 de decembre, queu post fai part de ‘na seria de tornar trapar l’istorique daus eveniments…

Tagged with: ,

carreus 2, plintas e junts

Posted in Marengo by Mars on Març 8, 2010

L’i aviá pas pensat a la debuta, mas qu’es colhon de pausar daus carreus pel sòl sens plinta per protegir dins lo cas que l’i a de l’aiga que vai daicianta la paret. Laidonc calcule quant-ben de carreus de demoran e chausisse de far de las trenchas de 7cm dediens, entau ‘las siran tant nautas coma las plintas de fusta que bordejaran lo demai de la chambra. Un còp tot talhat me demòra ‘mas un carreu entièr, non solament nos sem pas manquats dins la quantitat de ‘chaptar mas tampauc ne’n petèi pas tròp au punt d’èsser cort sus la fin…

Pause de las plintas dins los recantons qu’acculhiran lo frigò e lo mòble de la mamet de Lutz que ‘la i ten coma a sos uèlhs.

Ne’n mete tamben entre las chambas que formaran un mòble jós la baciá, quelas de quí que se veiran pas a la fin son presa en prioritat dins lo mitan d’un carreu, i a pas besunh d’aver un bòrd brave. Me permetran de tenèr la pòst de sèu. Ami ‘las me rigidifian l’estacha de la colona en L qu pòrta los plans de trabelhs a lor junccion. Mencion d’emmerdament especiala per passar au maximum darrièr los tudeu d’evacuar l’aiga.


Aprèp fau emplenir los cròs de mastic de junts quò se gascha mau per qué quò es fach per èsser estanche laidonc quò se boira mau dins l’aiga. Se ne’n pausa mai que necite e s’essuja tant qu’es fresch ; fau esperar un pauc, que « tire » mas pas tròp per si de non se tira tot en grumèus ò se tira pas… Urosament la sufàcia es pron pita per lo graissar de pertot davant de tornar a la debuta. Me manque un pauc sus la quantitat de gaschar e l’i a 6 lonjors que deuran esperar la sesilha d’aprèp.


Las fòtos me disen que las son estadas presas entre lo 16 e lo 18 de decembre, queu post fai part de ‘na seria de tornar trapar l’istorique daus eveniments…

Tagged with: , ,