Einucent's Weblog

Un plat vegetarian a mon biais

Posted in Uncategorized by Mars on Genièr 26, 2011

Recepta a la lesta, entau, que ‘chabe mas de la realisar. Las quantitats son a vusda de nas, faretz a la vòstra mòda. Prenguèi pas de fòtos queste còp, perdon.

  • Pialatz pron de trufas per emplenir un plat a forn ;
  • pialatz 2-3 lissas d’alh e tiratz ne’n lo germe ;
  • passatz la facia trenchada de ‘na lissa d’alh dins lo fons dau vòstre plat, mai sus los costats, hapcharetz lo demai ;
  • fasetz chaurar pron de bulit de salat per cubrir las trufas ;
  • fasetz de las trenchas de trufa, a la gròssa fau que siá 2 còps espès coma la lama dau coteu ; las botaretz a pre-cuere quora quò bulís ;
  • graissatz lo fons dau vòstre plat d’un culherat de sendós ;
  • esbrejonatz quauques calaus ;
  • cassatz un uòu dins ‘na calòta, battatz lo coma lo contengut d’un potinon de crema (10 cl), bujatz la mesma quantitat de leite dins lo potinon per espandir vòstre apparelh. Sasonatz au vòstre gost (sau, muscada per me) ;
  • trenchatz de pron de Forma d’Ambèrt per clafir la susfácia dau plat ;
  • ‘lumatz lo forn per lo chaurar a termostat 7 ;
  • las trufas deurian èsser cueitas (lo coteu deu punchar tras sens que la trufa l’i demòre estachada), gotatz-las (en gardar lo bulit !) pausatz ne’n la meitat dins lo fons dau plat ;
  • pausatz la meitat de l’alh hapchat sus las trufas e las trenchas de Forma mai los mai gros bocins de calau ;
  • bujatz las micas de calau e lo demai de l’alh dins l’apparelh ;
  • pausatz la segona meitat de las trufas ;
  • rapatz un brave bocin de Cantal per dessur lo tot ;
  • botatz au forn, a termostat 5.

La recepta es liurament inspirada daus cosins Arpitans dau Deaufiné, que son dins un país de calaus tant coma mos vesins de Perigòrd. Faguèi coma los fromatges qu’avèm n’autres dins lo massiu (e que ne’n ai maison, jós la man).

L’eideia es de far un plat sens charn mas semblaria de conven pas au gost de tots los vegetarians…

Tagged with: