Einucent's Weblog

Blagataba

Posted in Brico by Mars on Julh 12, 2012

Quo fai jà quauques temps que voliá gardar mon tabac dins ‘na blaga e coma los paquets dau meu son d’un model long òus dintran pas dins las blagas que trapèi dins lo comèrci. Laidonc me diguèi que ne’n anave farjar una a mesura, quo me permetria de mesnatjar la plaça per mon paquet de filtres amb un compartiment esprès.

Començèi per me dessenhar un patron. Lo faguèi sus un A3 de pitits carèus, per tombar sus de las mesuras simplas.

Qu’es possible de jaspir lo bocin en «T» au boçin en lonjor, e aver ‘mas una copa ente son representats ADIJ. Las mesuras son en mm.

Podetz tamben estampar lo patron (lo document .pdf es a l’eschalon 1:1) qu’es possible dins n’oficina de reprografia, fau damandar un estampatge en A3 e precisar dins Acrobat Reader «deguna mesa a l’eschalon». Las mesuras «230» sus naut e «170» debas siran pas sus la fuelha mas los contorns i dintran, que tots los biais anetz copar…
Las letras sirven de reperar coma assemblar. ‘Na mesma letra es utilisada per un mesme endrech de la blaga ‘chabada.
Los trachs puntejats simples (negre) son per marcar ente deven passar las cosuras, los trachs puntejats alternats (roge) son daus axes, ente que lo cuèr se deura…

  • plejar (bien plan en KL),
  • corbar (entre B e I / entre C e J)
  • ò junhèr (los trachs oblics jos E e H)

La realisacion es pas gaire complicada. Utilisèi la machina de Lutz que sabe que ‘la pòt cosèr 4 espessors de jean. Sa maire nos prestèt de las ‘gulhas conçaubudas per lo cuèr. Damandèi dau fiau de lin dins ‘na botica mas me conselhèren dau polyester.

  • Plaçar lo patron sus lo cuèr e trenchar. Qu’es un materiau omogèn, i a pas besunh de sègre lo sens daus fiaus coma per lo teissut. Podetz tirar profiech de la susfacia de peu en ne’n trenchar lo minimum.
  • Plejar lo long de KL, nubuck contra nubuck. Quò sira lo rabat per metre las fuelhas de ligar. Tenguèi queu pan plejat amb de las pinhas d’espandre los vestits. Pense aura que las quelas per los dessenh sirian estadas mielh.
  • Plaçar lo bocin en lonjor sus lo boçin en «T», costat lissos fàcia a se (dins los dos cas) en superpausar BFGC. Quò sira lo compartiment per los filtres.

    Cosèr de  K a F, virar a 90°, de F a G, virar de 90° e ‘chabar de G a L. Podetz constatar que lèverem pas la ‘gulha entre I e B, nimai entre C e J, qu’es pas la pena de s’apondre daus fiaus de ‘restar. Amai, bien cosut quò fai ‘na decoracion, per pauc qu’avetz chausit un fiau contrastat.
  • Aura, nos vam barrar lo compartiment màger per lo paquet de tabac. Chausiguèi la complicacion en lhi far daus cantons redonds (A↓E→F e G→H↑D). Los daisse se voletz vos i aventurar tamben. Aprèp còp, me dise que tant valia los daissar en angle drech, ò dau mens far ren-mas un canton copat, dessenhèi quel’opcion sus lo patron. La lonjor de F a A es caculada per la version corba. Esitetz pas de verifiar la mesura e eventualament de dobar lo pan «debas dau T».
    Prenèr lo costat nubuck fàcia a se queste còp. Pinçar la bordura (entre la linha puntejada e lo fons copat) de tau biais que quò fai un sachon, lo cotat lissos en dediens. Mèfi, quò eslampia ! ‘Na amiga me conselhèt (aprèp !) de tenèr lo tot amb de las crochetas puèi las tirar, normalament l’i a la plaça, mas sabe pas se lo crochetador per lo papièr passa bien tras lo cuèr.
  • Un còp cosut, virar lo sachon de ranvers per aver lo costat lissos defòra (e ma cosura asardièra ‘magada dediens).

Ai quauquas fòtos de vos mostrar tamben.

Advertisements