Einucent's Weblog

La lombricompostièra en usatge

Posted in Brico, Ecologia de tots los jorns by Mars on abril 19, 2013

Quò que mete dediens

Contunhe d’i metre gaireben tot, manca quò qu’es marrit per mon bestiau : inhons e  liças, que los fan fugir ; puèi las peus d’agrumes que prenen un temps bienurós per se descompausar, los fialons blancs entre los quartièrs fan l’afar.
La peu de banana se descompausa plan bien mas la fau troncinar, mai fendre la coa per bien far, que tot los biais ne demorara lo còr.
La peu dura de l’avocat pren dau temps mas quò vai. Parrièr, la fau copar en pitits bocins gros coma n’ongle. se fasèi pas quora ‘la es frescha, aprèp quauquas setmanas quò cassa coma dau veire.
La peu dau melon a bon caractèri, parrièr ne’n fau far daus bocins, destrije pas los pepins, se i a daus-uns que volen germinar, veirai. Quò ‘ribet amb ‘na grana de coja, mas sens seguda. Constatèi que la peu espessa (de la coja) se descompausa ‘mas parcialament, demòra la pelicula lissa dau dessur. N’i a totplen dins dau compòst madur, tamben coma la nervura de las fuelhas e las coas de pomas/peras e la rafla dau rasim.

Aviá legit que los vermes minjavan las còcas d’uòus, ne’n mettèi queu ivern esbrejonadas a la gròssa, emb la man. Ne’n tròbe d’engueras que son quitament pas estadas manhadas. Mete ‘na presa USB a costat per vos balhar n’eideia de la talha d’un brejon enquera tròp gros (si-ben, qu’es fosc, mon telefòne es pas cooperatiu !) Dempuèi decidèi de las pilar en pòuvera.uous-cendre
Dins lo mesme temps, coma vesètz, garde mas cendres de pipa au despart, allèra que las metiá dins lo compost coma lo demai. Me sembla que l’un e l’autre modifian lo pH dau compost. Las cendres lo fan venir acide, las còcas d’uòu lo fan venir basic. Pense ne’n metre conjuntament quora saurai mielh quin dosatge practicar. Benlèu que sira mai indicat directament dins lo terrenh.

Lo marc de cafè passa dins lo compòst tanlèu surtit de la cafetièra, pas la pena d’esperar que siá sec per ò tornar umidifiar… Los vermes se ne’n regalan.

Bacs

Comptave sus l’escolament dau compòst dins lo bas de dejós, e qu’es pas evident. Suvent, me fau tafurar coma las mas dediens per desgatjar lo bon a massar. Qu’es pas bien greu, aprèp, me frete las mas dins lo sable que tot lo biais servira per boirar au terrenh. Amai la tèrra, qu’es pas lord, qu’es nòble ! 😉

Aver dos bacs per reçaubre mas pialuras me permet de jugar de l’un l’autre. Se jamai queu completament dessur es tròp plen (e tròp compact) per contunhar de l’emplenir, passe son contengut dins lo segond e boire los bocins d’entièrs amb mos rebuts mai fresches.
Dins queu segond bac, tot es pas jamai minjat completament e demòra las parts linhosas tròp duras per los vermes. Destrije entau dau vertadièr compòst e un jós-produch d’usitar en palhatge que gardará lo trempe a las plantas en tot difusir dau compòst a mesure que las asaigue.per_palhatge

Mon tresenc bac e son filtre de pelha se boscha pus, en mai de las punhadas de compòst qu’i metèi en desgatjar los bacs de dessur, l’i vese ‘na liça de crema repartida au fons que me fai dire que quò retenh bien. Los vermes i davalan per s’i ‘magar. En teoria, qu’es dins queu environament que naissan los nenons. Ne’n viguèi totplen, mai pitits que quilhs de la debuta. Qu’es bon sinhe, la colonia s’instala.filtratge

Aiga

Daus còps, espere quauqus jorns davant de metre mas pialuras dins la lombricompostièra, e ‘las son tròp sechas e duras. Ensajèi d’i bujar mon aiga de cueire las pastas. Qu’es plen d’amidon e i a totjorn quauques bresuras au fons dau topin, tant vau que quò siá balhat au vermes. Quò destrempa lo contengut daus prumièr bacs e quò lo rinça per ‘ribar a queu de filtratge. Sabe bien que normalament ne’n faudria pas metre tant d’un còp e preferir quauquas pulverisacions regularas. Quò me faguèt un bon litre de tè de compòst jà diluit. Fau pas lo far sistematicament.
Ne’n tornèi metre un segond còp dos jorns aprèp e constatèi de la borra. Quò començava de chaumenir sus la quita susfàcia de mon bac de recuperacion. borra
Queu liquide lo vau tirar, tant pièger, e daissar bien colar e sechar lo contengut dau bac de filtrar.

I a un pauc tròp d’aiga tots los biais. Quò manca de matèria secha, per lo còp que ven, vau emplenir sus un tapis de carton e de las fuelhas.materia_secha

Autras bestias

Mos vermes son pas sol de se plasèr quí. Ai pas de moschalhons (per aura) mas ai totjorn ‘na constellacion de piauson blancs translucides que sabe pas bien se quò es bon sinhe. Afar de segre…piausons

Advertisements
Tagged with: ,

Una responsa

Subscribe to comments with RSS.

  1. Mars said, on abril 19, 2013 at 4:40 pm

    Doblidèi de precisar : lo compòst bien descompausat es chaud. Normalament los lombrics deurian permetre d’eschivar quò. Qu’es sinhe de compostatge classic, sens lor accion.
    Totparrièr, quò transfòrma mos rebuts…


Daissar un comentari

Fill in your details below or click an icon to log in:

WordPress.com Logo

You are commenting using your WordPress.com account. Log Out / Cambiar )

Twitter picture

You are commenting using your Twitter account. Log Out / Cambiar )

Facebook photo

You are commenting using your Facebook account. Log Out / Cambiar )

Google+ photo

You are commenting using your Google+ account. Log Out / Cambiar )

Connecting to %s

%d bloggers like this: