Einucent's Weblog

Queste còp qu’es chabat !

Posted in Marengo by Mars on setembre 24, 2011

Me suvene d’aver après que los indians d’Amazonia, passan daus mes e daus mes a colectar lo bòsc e las palmas per bastir lor maison puèi que se meten tots ensem per la bastir dins la jornada. Qu’es pas completament entau que nos l’i prenguèrem mas qu’es l’eideia, a la gròssa.

Vos aviá contat que daissèi sus la paret daus traucs per i vissar los encairs,
…vos aviá contat tamben que talhèrem de las pòsts per segre au mielh los angles de que fons de chambra. Aura perfeccionam las pèças de Meccano™ en pre-trauchar las pòsts per que l’encair puchèsse tenèr dessur e que quò siá pas pesug a vissar un còp tengut (asardosament) a la plaça que volèm qu’ocupèsse.
Assemblam dins lo mesme temps los triangles R… a las pòsts C…, que n’auram besunh per lor segurar daus punts d’apiejar sus 3 costats.

Coma volèm pas prenèr tròp de riscs tampauc, començam per la 6′ que pausa au sòl, e fixam la 5 per dessur (quò fai jà de qué se ‘magar dejós),
quilham la 9, quò nos fai de qué prenèr dessur las autras : 7, 8 e 3+R5 per barrar. 2+R4 ven en mai per far la basa dau blòc de casas C…

Tornam dau costat pendaria en metre 6 dins l’alinhament (hem… entau coma la paret lo permet) puèi la bara, que ten a l’encòp 4. De las bòstias de chaussaduras trapèren jà lor plaça.

Amb ‘na plena brassada de jurons pausam lo blòc C… e sens lo daissar tombar vissam los encairs per ò mantenèr en plaça. Demòra ‘mas de fixar 1+R1 per dessur.

Lutz s’afana de nettiar bien tota la sejadura…
…per poder veire en fin de jornada quò que balha amb los vestits dediens.

Aprèp, metre daus pès au sommier es estat tot simple. Dempuèi i podèm durmir

Tagged with: , ,

Estagieras de l’armari de la chambra

Posted in Marengo by Mars on decembre 3, 2010

Lo bastit

La paret de l’armari espera d’enguerras ‘na lissa d’enduch per la far bien plana pertot parièr. M’enganèi pas tròp dins la bastison mas daus uns còps los blòcs tomben pas bien en fàcia e l’espessor ne’n es desparièra entre lo naut e lo bas. Vòle pas reprodusir los errors que constatèi de las parets d’origina, queraque, l’i a dau chamin…

Graisse ‘na lissa d’enduch sus mos blòcs de beton celulari, en daissar la potra la mai neta possibla. Lo davant, puèi lo darrièr e la trencha

Aprèp, i a non-mas (qu’es un biais de dire) a raspar sus los racòrds e las subrepessors, totjorn amb la talòcha esmerilhada de Christian.

Per los bòrds, en perticulier bon ras lo plafond que sira pas cubert de tela de pintrar (e que vam pas manhar, quò n’irá, eh !) fau tirar l’eccès a la patela. Qu’es pron simple, la peja se tirar a l’esponja. En la trempar bien ‘la ven pron mòla per obtenèr un canton bien d’encair.

Las estagieras

Qu’es ‘mas lo calculatge per aura. Lutz se pensèt que lhi faliá accedir a ‘na pendariá d’un costat e sarrar daus vestits e de las chaussaduras (en casas) de l’autre. Quilhs dos costats (e lor larjor) son determinats per la dubertura de las pòrtas.

A man Mança, siran las casas e 2-3 pòsts per las chaussaduras, cortadas per las bòtas. A man dreita, l’i aura la pendariá, plaçada pron naut per aver de qué sarrar los cartons de dessenh debas d’un mantèu long. La pendariá es lo mai au fons, que fau pas dobledar que i aurá un liech de passar a l’entorn, alèra tant vau metre los vestits que surtissen lo mai suvent a l’endrech dau melhor accedir.

Auretz remercat que las pòsts a man Mança son en biseu per segre l’angle dubert dau canton de la paret de la finestra. Quela bela paret qu’era pas d’encair per ma bastison me pausa un problema tornamai : la dimension entre lo montant 6 + 6′ (veiretz aprèp la nomencladura) e l’angle dubert demesís a mesura que nos sarram dau plafond, las pòst a man Mança  ( 1  C3 C4 C5 2 e 3) deven laidonc èsser trenchadas au canton, un pauc mai a chasque niveu e lo triangle (R1 R2 R3 R6 R4 R5) que los menan a manhar e la paret de la finestra e ma paret (sus lor davant) ven de mai en mai pitit.

Bòrd lo montant 66′ per contra, nos ‘dobam la possibilitat de rasonar amb ‘na copa perpendiculara, que se pòt traçar au T de dessenh (per un còp !)

Lo dèfi que nos espera sira de far tenèr tot quò en plaça. Per aura, conçaubèi lo plan de montar :

Per entendre melhor los limeròs, que Lutz los atribuèt dins l’òrdre que ‘la l’i pensèt (pas coma mos casdrilhatges de batalha navala 😉 )

1 ‘na estagiera de superar lo tot, per sarrar sos grands bacs amb los vestits fòra sason ;

2 per portar un casdrilhatge de casas ;

3 per un prumièr niveu de chaussaduras…

4 ‘na pòst tant nauta que la dubertura de l’armari per i ‘nar enfonsar los borrilhs que se vòu dobledar 😉

5 per deseparar la pendariá d’un espaci debas (a la mesura d’un carton de dessenh) ;

6 per far un montant entre los 2 costats ;

6′ per qué 6 se pòt pas talhar d’un sol blòc dins ‘na plancha de 2m…

7 e 8 per metre d’enguerras mai de balarinas e de Birkenstock. Lutz me ditz que la tolozana mejana a mai de paras de sendalas que non-pas de bòtas. Lo sabe bien, mas totparrièr, quò ne’n fai beucòp de sarrar !

9 per portar los 2 de davant e daissar pron de plaça per de las paras de bòtas (que ‘la ne’n a quauqu’unas totparrièr) ;

C1 e C2 per far daus montant que solidifian las casas (e empachan los tas de pulls e chamisons de  s’esclafoirar)

C3 C4 C5 per pausar los tas de pulls e chamisons !

R1 R2 R3 R4 R5 per aver de qué pausar au quite fons dau canton mau fotut, e juscanta bon ras de la paret qu’apondèi, ieu ,

R6 per qué aviam dobledat de las casas fasian 3 planchas per 2 e non pas 2 per 2 !

Parquet

Posted in Marengo by Mars on novembre 18, 2010

La chambra màger es aura ‘chabada, Sarram un maximum de chausas dins la chambra de durmir (que permet pus d’i avançar un pas !) e nos desgatjam un accès au lino (que nos fará la sous-couche). Gardam ren-mas los utilhs que nos faram besunh sus l’espandi carelat de la cuesina mai lo bureu e la biblioteca que duram tornar plaçar a mesura.

Començam per lo canton entre lo bar e la paret que vai juscanta la pòrta de la chambra de durmir.

Passam quela pòrta per aver la contunhetat e eschivar d’i metre ‘na bara de seu. Faram lo demai dins la pèça máger e prendram lo relai dins la chambra de durmir un còp sas parets ‘dobadas. Passar la pòrta damanda de talhar a la seja electrica au mai prèp la fòrma de la motladura.

Avançam lo long dau bar e talham de que virar a l’entorn dau canton cuesina.

La lonjor d’aprèp es trenchada en segre un biais. Los carèus son linhats sus ‘na perpendiculara distinta de la clinason que la paret allèra que lo parquet (maugrat ‘na correccion dau despart) es linhat sus la paret dau fons. Emplenam lo pitit fons dejós l’estagiera prèp de la pòrta de dintrar e junham lo tot au reng d’aprèp ; sens dobledar la motladura, solide.

Podetz constatar que nos fau tot lo temps moure los mobles que son sus lo lino per los metre a mesura sus l’espandi ente que l’i a dau parquet. Nos demorará las plintas a clavelar debas de las parets, las son fina tot lo long, manca sus la paret contra lo balcon ente que la plinta servirá de ‘magar los fiaus electrics.

Las fòtos me disen que son estadas presas entre lo 2 e lo 6 de març .

Tagged with: , ,

Taulets

Posted in Marengo by Mars on març 8, 2010

Dau temps que ‘la se mainava de fustariá, Lutz lasurèt tamben las pòsts que van far daus taulets sus lo beton celulari, veiquí lo pitit pan de paret que dessepara la cuesina de la pòrta de dintrar, amb las pòsts blanchas dau dejós que son estadas recuperadas dins las vòrras qu’eran vissadas sus la pòrta

E veiquí la dau bar qu’es d’engerras a sechar per esperar sa tresena lissa, auretz calculat en passar que lo bar venguèt violet…

Las fòtos me disen que las son estadas presas entre lo 13 e lo 20 de febrièr, queu post fai part de ‘na seria de tornar trapar l’istorique daus eveniments…

Pòrta de la chambra de durmir

Posted in Marengo by Mars on març 8, 2010

Lutz s’a mainat de pintrar totas las fustarias. La pòrta de la chambra freta lo lino pel sol, coma vam metre un parquet, la deu imperativament èsser trenchada d’un biais que siá mens lonja.
La trenche a la sija sautadoira mas i a totjorn besunh de corrigir amb lo rabòt, la raspa e la lima, quora i a un nos que fai virar la lama.

Quela porta se dubrís de vers lo liech e oblija a dintrar dins la chambra en ‘nar costejar la paret allèra que la se sarra a 45° amb un radiator amai… (vejatz lo plan)
Pas question de la gardar entau, bosche tots los traucs, que sian sus la pòrta ò sus lo chambran, e ne’n chave d’autres a la bona plaça. Sus lo chambran, fau inversar de mança a dreita, sus la pòrta qu’es de ‘na fácia l’autra.

Coma fau pas sijar tròp luenh, los talhe au ciseu davant de chabar pròpament a la lima. Tamben, coma la fòrma seguís las fibras dau bòsc, i a besunh de jugar amb la pasta de bòsc per tornar trapar l’espessor que vai bien.

L’empaçament dau bloc de sarralh conven pas per i plaçar ‘na charniera, quò me damandaria de burinar dins lo tenon que ten los paneus que Lutz a cubert d’Isorel, tròp riscat, place laidons ma charniera mejana un pauc debas e trace un trauc de mai de far sus lo chambran.

Veiquí, un còp pintrada de son gris clar definitiu, pus ren se veu.

Las fòtos me disen que las son estadas presas entre lo 25 de genièr  e lo 2 de febrièr, queu post fai part de ‘na seria de tornar trapar l’istorique daus eveniments…