Einucent's Weblog

Carrelatge de las parets de la cosina !

Posted in Marengo by lutzdetolosa on decembre 3, 2010

Re-adissiatz brave monde ! Segond còp que preni lo clavièr per contar aquí que si, si, malgrat las aparéncias, trabalhi tanben ! 🙂

Acabèri lo carrelatge de las parets de la cosina que l’òme comencèt, per qu’el posquèsse anar començar las parets de la cambra (reperatge, bastison, seguida del bastison, lintèl…) M’agradèt plan coma job !

E vaquí la resulta, un còp tot acabat e sec ! 🙂

Una polida cosina operacionala. E sabètz qué ? E ben, dempuèi, me meti a cosinar !

Advertisements
Tagged with: , ,

Estagieras de l’armari de la chambra

Posted in Marengo by Mars on decembre 3, 2010

Lo bastit

La paret de l’armari espera d’enguerras ‘na lissa d’enduch per la far bien plana pertot parièr. M’enganèi pas tròp dins la bastison mas daus uns còps los blòcs tomben pas bien en fàcia e l’espessor ne’n es desparièra entre lo naut e lo bas. Vòle pas reprodusir los errors que constatèi de las parets d’origina, queraque, l’i a dau chamin…

Graisse ‘na lissa d’enduch sus mos blòcs de beton celulari, en daissar la potra la mai neta possibla. Lo davant, puèi lo darrièr e la trencha

Aprèp, i a non-mas (qu’es un biais de dire) a raspar sus los racòrds e las subrepessors, totjorn amb la talòcha esmerilhada de Christian.

Per los bòrds, en perticulier bon ras lo plafond que sira pas cubert de tela de pintrar (e que vam pas manhar, quò n’irá, eh !) fau tirar l’eccès a la patela. Qu’es pron simple, la peja se tirar a l’esponja. En la trempar bien ‘la ven pron mòla per obtenèr un canton bien d’encair.

Las estagieras

Qu’es ‘mas lo calculatge per aura. Lutz se pensèt que lhi faliá accedir a ‘na pendariá d’un costat e sarrar daus vestits e de las chaussaduras (en casas) de l’autre. Quilhs dos costats (e lor larjor) son determinats per la dubertura de las pòrtas.

A man Mança, siran las casas e 2-3 pòsts per las chaussaduras, cortadas per las bòtas. A man dreita, l’i aura la pendariá, plaçada pron naut per aver de qué sarrar los cartons de dessenh debas d’un mantèu long. La pendariá es lo mai au fons, que fau pas dobledar que i aurá un liech de passar a l’entorn, alèra tant vau metre los vestits que surtissen lo mai suvent a l’endrech dau melhor accedir.

Auretz remercat que las pòsts a man Mança son en biseu per segre l’angle dubert dau canton de la paret de la finestra. Quela bela paret qu’era pas d’encair per ma bastison me pausa un problema tornamai : la dimension entre lo montant 6 + 6′ (veiretz aprèp la nomencladura) e l’angle dubert demesís a mesura que nos sarram dau plafond, las pòst a man Mança  ( 1  C3 C4 C5 2 e 3) deven laidonc èsser trenchadas au canton, un pauc mai a chasque niveu e lo triangle (R1 R2 R3 R6 R4 R5) que los menan a manhar e la paret de la finestra e ma paret (sus lor davant) ven de mai en mai pitit.

Bòrd lo montant 66′ per contra, nos ‘dobam la possibilitat de rasonar amb ‘na copa perpendiculara, que se pòt traçar au T de dessenh (per un còp !)

Lo dèfi que nos espera sira de far tenèr tot quò en plaça. Per aura, conçaubèi lo plan de montar :

Per entendre melhor los limeròs, que Lutz los atribuèt dins l’òrdre que ‘la l’i pensèt (pas coma mos casdrilhatges de batalha navala 😉 )

1 ‘na estagiera de superar lo tot, per sarrar sos grands bacs amb los vestits fòra sason ;

2 per portar un casdrilhatge de casas ;

3 per un prumièr niveu de chaussaduras…

4 ‘na pòst tant nauta que la dubertura de l’armari per i ‘nar enfonsar los borrilhs que se vòu dobledar 😉

5 per deseparar la pendariá d’un espaci debas (a la mesura d’un carton de dessenh) ;

6 per far un montant entre los 2 costats ;

6′ per qué 6 se pòt pas talhar d’un sol blòc dins ‘na plancha de 2m…

7 e 8 per metre d’enguerras mai de balarinas e de Birkenstock. Lutz me ditz que la tolozana mejana a mai de paras de sendalas que non-pas de bòtas. Lo sabe bien, mas totparrièr, quò ne’n fai beucòp de sarrar !

9 per portar los 2 de davant e daissar pron de plaça per de las paras de bòtas (que ‘la ne’n a quauqu’unas totparrièr) ;

C1 e C2 per far daus montant que solidifian las casas (e empachan los tas de pulls e chamisons de  s’esclafoirar)

C3 C4 C5 per pausar los tas de pulls e chamisons !

R1 R2 R3 R4 R5 per aver de qué pausar au quite fons dau canton mau fotut, e juscanta bon ras de la paret qu’apondèi, ieu ,

R6 per qué aviam dobledat de las casas fasian 3 planchas per 2 e non pas 2 per 2 !

Parquet

Posted in Marengo by Mars on Novembre 18, 2010

La chambra màger es aura ‘chabada, Sarram un maximum de chausas dins la chambra de durmir (que permet pus d’i avançar un pas !) e nos desgatjam un accès au lino (que nos fará la sous-couche). Gardam ren-mas los utilhs que nos faram besunh sus l’espandi carelat de la cuesina mai lo bureu e la biblioteca que duram tornar plaçar a mesura.

Començam per lo canton entre lo bar e la paret que vai juscanta la pòrta de la chambra de durmir.

Passam quela pòrta per aver la contunhetat e eschivar d’i metre ‘na bara de seu. Faram lo demai dins la pèça máger e prendram lo relai dins la chambra de durmir un còp sas parets ‘dobadas. Passar la pòrta damanda de talhar a la seja electrica au mai prèp la fòrma de la motladura.

Avançam lo long dau bar e talham de que virar a l’entorn dau canton cuesina.

La lonjor d’aprèp es trenchada en segre un biais. Los carèus son linhats sus ‘na perpendiculara distinta de la clinason que la paret allèra que lo parquet (maugrat ‘na correccion dau despart) es linhat sus la paret dau fons. Emplenam lo pitit fons dejós l’estagiera prèp de la pòrta de dintrar e junham lo tot au reng d’aprèp ; sens dobledar la motladura, solide.

Podetz constatar que nos fau tot lo temps moure los mobles que son sus lo lino per los metre a mesura sus l’espandi ente que l’i a dau parquet. Nos demorará las plintas a clavelar debas de las parets, las son fina tot lo long, manca sus la paret contra lo balcon ente que la plinta servirá de ‘magar los fiaus electrics.

Las fòtos me disen que son estadas presas entre lo 2 e lo 6 de març .

Tagged with: , ,

Chauratge

Posted in Marengo by Mars on Novembre 18, 2010

Recapitulacion daus trabelhs jà ‘dobats. Lo biais de chaurar es basat sus daus convecteurs que son tròp goluts en energia (representats per daus VAVAV).

2d_cuisine_plan_elec1

 

Los vam chamnhar per un radiateur à inertie per la chambra magèr, e per un panneau rayonant dins la chambra de durmir (representats per daus XXXX). Lo de la chambra d’aiga es sus lo circuit de la presa zèro, i podram pas branchar ‘na bujadièra !

2d_cuisine_plan_elec2

Dins la chambra d’aiga podram gardar un convecteur, que l’i siram pas tot lo temps. Lutz lo desplaçèt per far de la plaça a la bujadiera e sa surtida es aura la presa 4′.

Dins la chambra màger, instalèrem jà lo radiateur à inertie per l’ivern passat. Son fiau es ‘magat jos la plinta per contra. Dins la chambra de durmir, reperèi ente trauchar per los vis que tendran lo supòrt dau panneau rayonant que fixarem un còp las parets pintrada d’un biais definitiu.

2d_cuisine4Lo shema electric un còp petaçat.

Tagged with: ,

Linteu de l’armari

Posted in Marengo by Mars on Novembre 17, 2010

Pitit retorn rapòrt a quò que mostrèi jà : Bastiguèi juscant’au niveu 2. Profieche d’aver pron de plaça per reperar la fòrma de mos blòcs que pausaran sus la potra. Sabe que me demòra (tant a Mança qu’a dreita) 90cm de montar (quò qu’es representat en puntejat), los pòrte sus ‘na regla…

Place ma potra, que son espessor sirà la parrièra un còp maçonada, puei mos blòcs de talhar (representats meitat trasparents) per dessur, en equilibri. Un per un, en tot reperar lor emplaçament teoric sus la potra.

Armat de ma regla e de n’encair, fau segre lo desnivelament dau plafond per fin d’aver un traçat equivalent sus mos blòcs. 2 entiers a man Mança, un entier e ‘na chasuda de meitat a man dreita. L’entre dos sira comblat amb un bocin de chasuda talhat au mai prèp, dau mesme biais que ‘na clef de voûte (manca qu’es pas ‘na voûte…)

Quò me fai daus blòcs sarrats au mai prèp de l’espandi qu’ai mestièr d’ocupar. Dins la practica, deuran èsser un pauc redusit per comptar amb l’espessor de peja entre chasque niveu. Un còp que son plaçats (en fòrça) dessenhe un trach equivalent a quò que faudria tirar.

Los place pel sòl e balhe un bon còp de la raspa magica de Christian per ne’n davalar lo niveu, d’un costat (lo naut) mai de l’autre (lo bas).

Calcule que podrai pas gaire apondre de la peja sus lo fons naut, un còp que siran plaçats ; amai quò risca de se tirar au moment de rasclar lo plafons per ‘ribar a la bona plaça. Per èsser segur de ne’n gardar pron, me chave un casdrilhatge que tendrá bien quò que tendrá… Lo casdrilhatge permet, d’un sens l’autre de verificar la prundor (aus crotzaments e d’un blòc l’autre)

Veiquí lo result que pogueretz jà veire i a quauques jorns.

Tagged with: , ,

Ente ne’n sèm per aura

Posted in Marengo by Mars on Novembre 11, 2010

‘Na fòto sens esperar mantuns mes de retard per un còp.

Tagged with: , ,

Armari 3

Posted in Marengo by Mars on Novembre 11, 2010

Mon sòcle pren dau temps per sechar, tant melhor, lo mortier prendra mielh en s’i boirar. Monte un prumièr niveu.

Me balhe compte a queste moment que : d’un quò avança tròp e ma dubertura fai mai 1m75 que pas 1m80 ; de dos lo mortièr se fendilha entre lo crépi e mon blòc e quò ne’n vòle pas. Chausisse de chavar n’eissagniera, lo long de la paret existenta queste còp.

…quò permet de constatar que l’enduch que i a sus la brica es estat emplenit dau vielh platre a mesura que trapèren daus traucs.

Aprèp quò se monta…

 

 

 

 

Tagged with: , ,

Armari 2

Posted in Marengo by Mars on Novembre 11, 2010

Faguèi ‘na pausa dins lo chantier de queu armari per qué voliá chabar los carreus a la cuesina davant. La rason n’es simpla. Vòle pausar mas parets sus un sòcle bien de niveu. Per far queu sòcle me fau un boiradís de peja per carreus amb dau sejadís de beton celurari. Gardèi tot mon sejadís de las copas que faguèi davant, mas tant vau d’usar mas fins de gaschadas per far quò. Laidonc per quauquas setmanas avèm ‘gut drech a l’episode carreus. Comencèi ieu, puèi Lutz me prenguèt lo relai a la meitat per me permettre de contunhar la bastison.

Naturalament los tasseus de cofrar son linhats ensem d’un costat l’autre amb ‘na granda regla. Emplene pas totalament l’espandi que daisssan, vòle solament recuperar lo niveu dau sòl per que siá mai rigorós que dins la cuesina.

Doblidèi de vos contar quauques autres preliminaris… Calculèi un brave temps coma percir las charjas que representan las bricas que fan lo linteu e quò nos semblèt tròp riscat de las far tenèr totas solas. Laidonc avèm trapat ‘na potra que sira maçonada dins la paret de l’armari e que fará, ela, lo linteu.

Coma totjorn dins quela chambra tòrta, fau portar dessur la mesura de las variacions calculada amb las parets. Los darrièrs trocins de beton celulari (quilhs que son meitat naut coma los autres)  son de bon manhar per quò, amai son de bon fisar, son ilhs que la portaran au mai direct.

Auretz remercat au passatge que m’a faugut biselar mos blòcs per segre au mielh.

Pause ma gaschada dins los cofratges, ‘na fuelha de jornau e 2 blòcs de nautor parrièr, mai ma potra per dessur e espera que ajèt pres un minimum. Dins l’entretemps, chave un rejon per daissar passar quela salopariá de goulotte que pòde pas encasdrar dins la paret.

Lo niveu me dís que m’enganèi pas per aura.


 

Tagged with: , ,

Reperatge per l’armari de la chambra

Posted in Marengo by Mars on Novembre 11, 2010

Prenguèrem dau temps per n’autres sens pensar tròp au chantier, queu estiu, aura que la dintrada se premia per quilhs qu’an escòla, tornem calcular un fum de chausas tamben.

Nos demòra un bocin de bastison, volèm farjar un armari murau paralèl a la parèt daus fons de la chambra, sira barrat per de las pòrtas sus ‘na ralha. La ralha deurà èsser de niveu e la dubertura dins la paret a l’aplomb de las portas… E deguna paret de se basar dessur es d’encair, mas dins queu apartament començam de ne’n aver la costuma.

I a pas besunh de gaire, ren-mas de dos bocins de paret : l’un costat finestra (que barrará lo fons de l’angle dubert)’quí, la paret existenta se clina en dediens de la chambra en daissar 8 cm entre lo bas de l’aplomb dau naut ; e l’autre costat chambra d’aiga, ente que la paret existenta se clina de 2cm en defòra, entre l’aplomb dau bas e lo naut. Queu bocin ‘magará la bòstia electrica e subretot portará lo linteu. Per tornar pas descriure ente son tots los còps, a comptar d’aura los vau ‘pelar respectivament Mança e dreita. Quò s’entend en visar la dubertura dempuèi la chambra, pas dempuèi lo dediens de l’armari, torçuts que siètz, vos coneisse. Me garde na’ dubertura d’alentorn d’1m80, quò sira un pauc mens segon coma pòde pejar ma bastison au mai prèp de quela (pas dreita…) que trape.

Las parets son clinadas de tau biais de la copa daus blòcs per l’una me permet de tornar usar las chasudas per l’autra ,urosament ! Podrai far servir 7 blòcs de beton celurari, renjats en 2 còps 3 e mièja. Comence per traçar quò que me servira per bastir dreita, qu’es cepte, son tots los uns sus los autres. Qu’es mai complicat per Mança, qu’es mai larja qu’un bloc sol. me fau tornar usar ma chasuda e lhi talhar un bricon complementari. Ai dos biais de talhar que complement, siá en copar perpendiculari au sòl, siá en segre la ‘clinason de la paret. Dins tos los cas, vòle pas aver n’eissagniera tot lo long, fau que mos junts sian pas ‘linhats. Si aplique la mesma chausida a tots los niveus qu’es quò que vai ‘ribar. Chausisse de ò far un còp sur dos, e obtene un result que me permetrà de ò montar mielh.

Quò me fai un plan de copar un pauc estranh mas que me permet d’usar au mielh ma surfácia.

En passar, veiquí coma traçar de las linhas paralèlas :

Enfin me suèi mes un fiau de reperar lo niveu juscant’au que me faudrá montar.

Tagged with: , ,

Avançam !

Posted in Marengo by Mars on Abriu 3, 2010

Quauques imatges per enentendre ente ne’n èrem a la debuta dau mès de març.Me fau daus guides de cartons per saber coma trenchar mas pòsts de far los seus.

…los place bon ras las unas de las autras, la pita que fai la façada de seu es fixada prumièr, per dejós, entau quò se veu pas.

Pòrte lo tòrt de la paret sus un carton tamben per poder dobar lo plan de trabelh. Podetz constatar la brava diferença, a l’entorn d’un detzenat de cm !

Aura que coneisse l’espandi ocupat per lo plan de trabelh, pòde i plaçar la placa de cueson, en pertir de sas mesuras. Punteje ente que sira lo trauc fach a la seja cilindrica puei trace los fons dau trauc d’entier en prenèr las tangentas. Naturalament quò se deu far sus lo revèrs, que en tornar montar, le seja electrica en tornar montar, talas coma son sas dents escharonhan la fácia que se veu mas daissa ‘na copa neta sus la fácia qu’es virada vers lo sòl.

Per la baciá qu’es mai simple, ‘la es mens pesuga de pausar de revers per traçar.

E coma chas Ikea pensèren au monde que se volen personalisar lo costat que sirá lo pitit bac, prepausan l’ustilh que permet de se trenchar l’inox per passar lorobinet dau bon biais.

Lo prumier plan de trabelh passa tot bèu, podetz veire que fauguèt chavar un pitit pauc lo montant dau bar per lhi permetre de dintar bien.

Son cosin ven prenèr lo demai de plaça que daissèrem. Demòra non-mas 1-2 mm qu’empleniram amb dau junt silicòne aprèp d’aver segurat lo niveu amb daus encairs, coma ne’n i a jà per las estagieras dejós.

Los plans de trabelhs amb lors elements encasdrats dediens : baciá e placa de cueson.