Qu’es Lutz que ò fai !

Uèi, me falia chabar lo trabelh precís e pesug de fixar los fiaus (tròp corts) la presa de la chambra dins un recanton ente m’i pòde pas tenèr a ma man. Aviá ‘restat ièr de ser au moment que me vesiá fotre un còp de ranger dins lo fotralh. Aura que podèi barrar lo cubert, gause pas la tornar dubrir pre ren que siá ! Ai vòugut far passar lo fiau de telefòne au bèu dediens de las bòstias e me trape de deurefar passar los fiaus electric en dejós de la bòstia de telefòne. Bon quò sirá bien ‘magat e tot los biais qu’es pas un espaci public, sèm ‘mas dos d’i èsser convidats, d’abòrd !

Dins quèu temps Lutz me dissèt que ‘la volia far ela lo demai que demorava, qu’es de dire deseparar la linha que ‘rieba au convecteur de la chambra d’aiga per ne’n far ‘na preas per la bujadiera e lo lonjar juscanta ‘na nuvela surtida de cables per tornar plaçar lo convecteur. ‘La comença per reperar sos traucs per lo supòrt e la surtida de cables. Puèi la passa un brave temps de jugar amb la ‘gulha entre lo trauc existent e lo que la chavèt mas (m’i ensajèi tamben, quilhs cornards fotèren de la lana de veire dins ‘na paret interna a la chambra d’aiga). La presa pren la plaça debas, lo supòrt s’installa au plan de dessur e lo fiau dau convecteur ven se junhèr amb un domino, pròpament dins la bòstia de surtida de cables. ‘La era tota fieròta ma bricol’girl !

lo fiau 'riba sus naut, la presa es pausada debas

aprèp d'aver trauchat descubrissèm que la lana de veire vai geinar la 'gulha

e veiquí lo trabelh !

la coneccion dau fiaus, sus un trastèu qu'es mielh per s'esmaronhar pas …

Electricitat 2

Lo shema electric un còp petaçat. lo circuit 0 ente que i avia lo convecteur de la chambra d’aiga se deseparava en 2, branchats sus lo mesme diferenciau, reperèi que que m’interessava e lo branchèi sus lo 4, quò me fai ‘na presa 4, que servira pas suvent, e ‘na presa 4′ per la bujadiera. Lo circuit C (chambra es perlonjat juscant’a trauchar la paret e furnir de qué branchar lo Mac amb C’ e C”, parrièr dau telefòne. 2 montèt a nautor daus uelhs e daissa sa plaça a 4. 4 e 5 que passavan en delà de la baciá, son tornat prèp dau comptador, 5 es jòs lo plan de trabelh, sus lo plan ‘la es representada per ‘na presa sens lo pitits punts, qu’es ‘mas ‘na surtida de cables. 6 s’a trapat ‘na bessona 6′. Los convecteurs de la pèca màger e de la chambra siran emplaçats. La presa de TV demòra (om sap jamai) mas la de telefòne que la costejava desapareis, lo fiau es tojorn quí, per cas.

Los traçats verds son taus coma se brancha sus los diferenciaus (repetits debas, dins l’òrdre)

Chambra de durmir e boschatge

Pensam de nos poder estachar a montar de las parets de beton cellulari, aura  que las dalas son totas despejadas. Per contra demòra ‘na chardavilha que nos empacha d’avançar.

Los einucents que fotèren ‘na goulotte purida a la chambra an pas comptat amb lo nòstre armari murau. Me vai faler desplaçar la presa de telefòne que ‘la sia pas dedins e sarrar la presa electrica que ‘la sia pas jós lo liech. Fau que la goulotte sia pausad davant de bastir la paret de l’armari per dessur. Solide siria estat mielh de tot passar darrièr la paret mas ‘quí, quò se pòt pas, la es en dur e pas en placo. Passe ‘na jornada de mai sus mos genolhs per fin finala daissar ‘na presa badanta que los fiau i dintran mau. Aime pas quelas saloparias de presas en retleu que son ladas que ne’n poden pus e amia quan pas la plaça d’i lotjar los fiaus. Daisse la chambra dins l’estat aproximatiu que l’ai trobada, qu’es pas greu nos vam pintrar per dessur.

Si de non mon amorosa s’a mainat de boshar los traucs que faguèi per tirar mos cables, aura anem tornar trobar de las parets de bon presentar. ‘La damandèt a un amic de venir per intervenir sus la plombaria. Urosament que sabe pas sodar. Òu tornèt  plaçar a la chambra d’aiga la ‘ribada qu’era prevusda per la bujadiera, me mainarai de son evacuacion, per aura tirèi lo tudèu de jós la (futura) baciá.

coma tornar usar las chasudas de traucs per las nuvelas presas… e se deslaçar un pauc.

Crevam la dala

Lo temps vai començar de nos mancar, laidonc, ren-mas un pitit mot per dire que nos estacham a tirar las dalas de lino que son sus l’espandi ente que i aurà daus carrèus per la cuesina. D’unas son apena pejadas e venan plan, d’autras son solidament fixadas e l’i fau ‘nar au burin per las tirar, quò permet d’esculptar de las fòrmas dediens…

Si de non descubriguèrem coma son a tornar far l’eschalièr, avia de la charra amb la bòscarias a l’anciana e lor agrada mielh de tot ‘magar puslèu que de ò nuvelar bien, quò nos a bien fach esmaronhar.

Pintrura

Daisse de costat l’electricita, quitament se demora quauques detalhs de dobar. Lutz faguèt expertisar l’appartament davant de ò chaptar, se trapa que i a de las traças de pintrura au plomb dins 2 endreches… faguèren n’enquista que nos mostrèt lèu que son las 2 pòrtas que ne’n son resosponsablas. L’urgent es donc de nettiar la pintrura vielha per poder pintrar pròpament, qu’era l’eideia, tots los biais.

Blanc, irange (hum !), 2 tintas de burèu, blu, gris clar, gris sombre e… lo plomb davant de 'ribar au bòsc.

La pòrta de la chambra d’aiga es nòva, i a pas besunh de la manhar. Nos demòra la pòrta de la chambra e la dau sèu de dintrar (que faram mas au dediens.) Las traças nos daissavam pensar que i avia mantunas lissas dessur. Tant lèu que passa un prumièr còp de dissolvant, vesem lo bòsc passar per totas las colors de l’arcolan. I a ‘gut 8 niveus de pintrura tots los uns per dessur los autresc oma ‘la dís : en contunhar entau dins 20 ans, quela pòrta era 3 còps espessa coma a la debuta !

Tiram quò que podèm amb n’espatula mas lo dissolvant secha e qu’es lèu tant mau cepte coma a sec. Aviá pensat de poder passar las moluras amb ‘na bròssa nylon de mettre sur lo trauchador. Fau un ensaj sus la pòrta de dintrar : tot vai pla juscanta la lissa dau plomb, en frettar, quò chaurra e quò ven mòble. Qu’es coma si un masticador s’era cunhat dins los piaus e los empejava ensems ! Lo piceu nylon es bon per tornar banhar dins lo produch chimic e servira coma Parcimòni (au contrari de son banh, auriam vòugut eschivar)

Ma polideta au trabelh

Me sembla que la pintrura au pomb es la mai vielha, s’agís de ‘na mena de bureu, la color d’un vielh masticador daissat dempuèi d’annadadas dejós ‘na taula de liceu (dijatz me pas que n’avetz jamai vust !), cubert de ‘na pintrura grisa fòrça sombre, coma negra. Entre quilhs dos sabe pas. Tojorn, la lissa dessus lo gris ten bien e pertís per tots pitits esclats que volan de pertot, vos dise pas ente trobèi los mai coquinassons. Los ancians occupant an vòugut cubrir de colors que devian èsser tendència a l’espòca, mas quinas espòcas ! : vesem un blu/verd d’aiga, qu’es estat assurtit coma dau ròse (defòra/dediens, benlèu los dos.) Puèi retorn au calme amb un bureu, 2 tons, lo mai ancian es tot plen de traças brunas coma si era estat plaçat sus naut d’un forniau gras. Passatge rapide per un irange de la mena vestits putrides de las 70’s per chabar per un blanc tot lisse que se tira sens tròp de mau mas qu’es estat passsat en 4-5 lissas en boschar a l’encòp daus traucs dins la paret !

Anèm per vos far paur, veiquí la charra qu'a degut aver la deco fuguèt un temps.

Tornam queste ser en decidir de se descoratjar pas davant lo trabelh que demòra. Avèm gaireben junhat lo mai prund sus un quart dau chambranle e ‘na brava part dau primier cosa de pòrta. En tot parpalhonar daus còps sus la pòrta de dintrar de temps en quora per demorar pas tot lo temps  ‘clinat sus ‘na nautor d’establit.

Electricitat

Daus circuits que volem n’i a un qu’es sus la bona paret dos que son sus la marrida e que vai falèr mòure. Notam un limerò sus chasca presa (ò bloc de presa) e brancham un apparelh dessur per saber a quin diferenciau quò correspond. Los baissam metodicament un per un, urosament lo tableu es noveu e moderne.

Ieu chave un trauc dins lo placo en bas (a costat daus tudèus de la baciá) en esperar poder trapar lo tube que mena los fiau : Quò l’i es crós, me balhe compte que la paret seguís l’eschalier e vira (en verd sus lo plan.)

Los banturles que faguèren los trabelhsan boschat queu espaci en tirar (pas bien) drech. Qu’es ‘quí que passa l’evacuacion dau vesin de dejós e la mager part daus circuits electrics que van sus la paret juscanta la chambra. Per contra, mai l’i enfonsèsse lo braç juscant l’espanlta, ‘ribe pas de manhar un fiau.

Descubre (en desmontar puèi lo tableu) que passan… per dessur, au mitan de la lana de ròcha. Chave lo nuveu trauc per lo tira-fum que tots los biais ne’n faudrà un. Lo minimum qu’esperave fai pas pro per manobrar quilhs fiau, aurai besunh d’un regard dins la paret, mai dins lo plafons. Lonje los trauc dau plafons en segre las parets, aura pòde passar mos cables.

Totas las presas que son de roge sombre siran de mudar en quauqu’un luèc mai per convenir ; en roge clar, qu’es quò que demorará. (clicatz l’imatge per entendre.) 4 e 5 son costat a costat mas son chasc’una sus lor circuit. amai 5 es ‘na surtida de fiaus, sens presa. Me sembla tota indicada per ‘na placa de cueson mas la fau far tornar bon ras lo comptador, e per passa l’angle (verd sus lo plan) qu’es pas evident. Fin finala ne’n daisse 30 cm darrièr lo placo per ‘mor que lo domino s’a cunhat.

Me demora d’autras circuits : lo zèro, que passa lo long dau balcon, es jòs ‘na goulotte vòrra, pejada au silicòne, que geinarà la plinthe, lo vam far passar dejós, pròpiament e pas gardar la presa de telefòne.

Lutz vòu aver son escritòri contra la paret de la chambra, fau menar un circuit per lo Mac e ‘na presa de telefòne, qu’es mai simple de las prenèr de la chambra (C sus lo plan)  e los passar per un trauconet pròpe. Costa chambra, la goulotte es tamben pejada au silicòne, qu’es segur, ma dròla es anti-silicòne. Ieu jugue dau burin per ganhar lo centimetre que me fau prenèr dins la brica per lotjar la bòstia electrica que me permetra d’aver ‘na brava paret plana.

Debuta de chantier

Tras que la a ‘gut las claus sèm pertits per començar los trabelhs amb un brave desboiratge de tot l’existent per tombar sus un appartament verge.

Comence per desmontar lo tira-fum, que traprá sa plaça en quauqu’un luèc mai. Despejam e davalam lo mòble de sus naut que daissava un espaci perdut de 15 cm entre se e lo canton. La peja (qu’aviam pas calculada) nos estrassa lo placo, aviam comptat poder trapar ‘na parèt neta, tant pièger. Tots los biais, l’i a de las traças de chavilhas de pertot.

Sus naut dau punt d’aiga, son estadas (mau) pejadas de las dalas de linoleum qu’imitan daus carrèus, las tiram per’mor que vam metre daus carrèus vertadiers. Lo placo compren sa dolor ‘quí tamben mas queste còp qu’es pas greu, quò sirá cubert.

Nos ‘restam quí per aura e pertissèm chaptar dau materiau de bastir, per aura la pèça es vuèja d’enguerras.

Lo desmontatge contunha, aprèp un intermède a far lo manobrièr (montar lo beton celulari au 3enc plan !) Ieu tire lo mòble que pòrta la baciá dau temps que Lutz tira totas las chavilhas, que siran pus necitas au mesme endrech naturalament. La se maina tamben de tombar tot l’enduch de la chambra que fai pas besunh en espessor, mai lo bas de parèt jós la lòtja, tot fendut (AZF, t’avem conegut !)

Qu’es ‘mas a queste moment que podem i veire clar sus l’escheme electric. Ne’n comence un pauc mas pòde ‘nar bien luenh. Quò sirà l’afar de deman.

Renovacion a Marengo

Mon amorosa se volia ‘chaptar un appartament per pus aver de ferma de pagar. Aura qu’es possible, ‘la passèt la prima a ne’n querre un e fin finala trobèt un pitit niu de renovar tot pròche de la Mediateca, sauriá pas dire sis qu’es d’enguerras Marengo o b’etot jà la colona. Suèi pas tolosan dempuèi pro.
‘Fin, l’i suèi ‘nat coma-v-èla per visitar e me semblèt que l’i avia beucòp de trabelhs. Qu’es quò que vos prepause de segre quí a mesura que los trabelhs avançaran. En esperar qu’avançaran pro per ne’n aver de mostrar regularament…

L’appartament fai un trentenant de m², s’i dintra dins ‘na peça principala ente se trapa a man mança un canton per far ‘na cuesina e drech davant lo demai de l’espaci que se pòt conçaubre coma un salon. Au fons de quela pèça ‘na parèt que dessepara ‘na chambra ; sus lo costat a man drecha un balcon puèi ‘na chambra d’aiga.
La chambra d’aiga es estada aponduda recentament, qu’es la part la mai nòva, auram pas gaire d’i manhar. La chambra desmerita un pitit còp de fraichir (las parèts son d’enduch que fai pensar a un crespit !) e l’i volem metre un armari en dur.

Lo canton que vai damandar la mager part dau trabelh qu’es queu de la cuesina. Lo fregièr e la bujadiera que vesem son jà estat recuperats per la proprietaria de davant, tan melhor, que pejavan pas dins lo nòstres plans. L’eideia es de ‘ribar a deseparar un canton cuesina dau demai que sirá …un salon  (seguissètz ?) Per quò far, volem montar de las parets per materialisar un bar que farà tamben un espaci de sarra tot un fotralh que mancará pas de se convidar.Lo mòble actau demòra dins l’appartament mas monta pas pro naut, e tot lo biais Lutz ne’n vòu pas, anem bastir en dur.

La lòtja que se veu sus la parèt dau fons es pas pro prunda per far un armari, per contra comptam installar dessur lo tira fum qu’es aura sus naut de la baciá ;  laidonc a nivèu de taula, lo plan de cueson.

Installam daus plans de trabelh en L, lo long de las parets en los far pausar sus de las pitas parets en beton celulari que fan a l’encòp de las chambas de s’apiejar e dau mòbles per dejós. Au 2 fons dau L encontran d’un costat lo bar, de l’autre (jós lo comptador mas eletric queu quí !) ‘na colona de pòsts que gardar de tombar dins la cuesina un còp chabat d’entrar.

Quò es bien brave sus lo papièr…
Per quilhs que son sos amics sus Facebook, Lutz fai veire d’autras fòtos dae son apartament.

Europe Écologie

Dau blanc per la Nadau

Dempuèi ma finestra, pòde veire tombar la nevia sus la ciutat de Còrdas. Dempuèi lo temps que reste a Tolosa, aviá perdut la costuma d’aver de la nevia davant de la Nadau ! Quora pense que la ten a Chaisson…